熱刺想簽加拿祖　接替孫興民

近期盛傳熱刺將會放走33歲隊長孫興民，根據英國媒體《Football Insider》最新消息，呢支倫敦勁旅計劃收購曼聯新星阿歷真度加拿祖，填補「孫仔」離隊之後嘅左翼位置。

據悉熱刺願意以1,500萬鎊(約1.57億港元)出售孫興民，FC洛杉磯已經提出斟介，有望成事，所以呢支上屆歐霸盃盟主準備簽入新左翼，並睇中阿歷真度加拿祖。呢位21歲阿根廷國腳被曼聯掛牌出售，冇份參加「美國之旅」季前熱身賽，只要有球會出到4,000萬鎊(約4.2億港元)轉會費，就可以帶走加拿祖。

雖然有傳意甲冠軍拿玻里有意收購阿歷真度加拿祖，但佢傾向繼續踢英超，熱刺喺爭奪戰之中有優勢，問題係會方能否滿足紅魔鬼轉會費要求。加拿祖上季為曼聯上陣58場，其中36場擔任正選，合共射入11及10次助攻，隊內創造入波能力僅次於般奴費南迪斯，因而獲得熱刺垂青。