巴塞狂吸金　搵到非洲財路袋4億

西甲冠軍巴塞隆拿近年陷入財困，甚至影響新加盟球員註冊，球會積極開拓新財政收入，近日又有收穫，根據西班牙《世界體育報》爆料，巴塞隆拿即將同剛果民主共和國政府達成協議，可獲得4,400萬歐元(約4億港元)贊助費。

據悉剛果民主共和國搵巴塞隆拿合作，推廣當地旅遊業，呢個非洲國家開出一份總值4,400萬歐元嘅4年合約，換言之，平均每年贊助費為1,100萬歐元。屆時巴塞男女子隊嘅訓練及熱身服裝將會有剛果民主共和國嘅標誌，上面寫有「非洲之心」字樣，並會喺巴塞廣告、雜誌、年報出現。

巴塞隆拿早前要求先收取2,200萬歐元，以便整靚盤數，為新加盟球員註冊，導致談判出現阻滯。幸好剛果民主共和國最終同意巴塞要求，並且資金已轉入球會帳戶，令合作水到渠成。