A米「侮辱價」買華荷域　祖記蝕到喊

AC米蘭計劃簽入前鋒，根據意大利媒體《足球市場》報道，會方提出以1,000萬歐元(約9,000萬港元)收購祖雲達斯射手杜辛華荷域，僅及祖記3年半前買入價嘅七份之一。由於杜辛華荷域只剩下1年合約，祖記可能被逼蝕大本賣人。

杜辛華荷域2022年1月由費倫天拿加盟祖雲達斯，當時轉會費高達7,000萬歐元，但呢位25歲塞爾維亞國腳，一直踢唔出應有身價，上季44次上陣僅入17球，並一度被新兵高路梅安尼搶走正選位置。

由於杜辛華荷域表現欠佳，加上年薪高達1,200萬歐元，祖記唔想同佢續約，惟有趁今夏出售華荷域，以免佢明年自由身離隊，令球會人財兩失。

AC米蘭眼見祖記要焗住出售杜辛華荷域，趁機壓價開出1,000萬歐元接貨，同時向杜辛華荷域提供一份僅及現時50%人工嘅合約。缺少買家情況下，祖雲達斯同杜辛華荷域可能都要硬食呢份「侮辱性報價」。