伊沙克正在蘇斯達養傷　轉會有錢分

深陷轉會傳聞嘅阿歷山大伊沙克，未有跟隨紐卡素到亞洲集訓，據報原來佢返咗母會皇家蘇斯達基地，養傷兼操練，如果最後完成轉會，蘇斯達仲會獲得分帳。

英國傳媒報道，伊沙克並未返回紐卡素大本營，而係去咗蘇斯達基地，不過伊沙克去向紐卡素一直知道，連日來該25歲瑞典射手大腿有輕傷，都喺蘇斯達治理，並使用蘇斯達設施獨自進行訓練。

盛傳利物浦力斟伊沙克過檔，並已達成個人條件，周薪接近30萬鎊(約311萬港元)，準備向紐卡素出價1.2億鎊轉會費(約12.4億港元)，不過紐卡素暫未收到正式報價。

原來伊沙克22年夏天由蘇斯達轉會紐卡素時，合約中包含二次轉會分帳，當時紐卡素以6,300萬鎊轉會費簽入伊沙克，如果下次轉會價格高於6,300萬鎊，蘇斯達就可得到多出金額10%，再根據國際足協規定，蘇斯達可再分多2%。

按此計算，如果伊沙克以1.2億鎊出售，比買入價多出5,700萬鎊，蘇斯達可獲12%分帳，大約680萬鎊(約7,000萬港元)。