伊沙克考慮「核彈方案」　被逼留隊或單方面解約

阿歷山大伊沙克為加盟利物浦，近期已同紐卡素正式「反面」！依家返咗前球會皇家蘇斯達練波嘅伊沙克，據報此行未有通知紐卡素亦未獲批准，面臨罰款處分。英國《每日鏡報》更報道，如果紐卡素堅持唔放人，伊沙克會考慮提出單方面解約，並視呢一步為「核彈級」嘅最後方案。

利物浦上月開價1.2億鎊收購伊沙克，但被紐卡素拒絕，呢位瑞典前鋒之後提出轉會要求後，被紐卡素踢出季前集訓名單，近日帶同私人教練返皇蘇操練，面臨球會罰款。據報伊沙克同經理人正商討，如果紐卡素一直唔肯放人，佢哋就會採取極端做法，提出單方面解除剩低嘅3年合約。

伊沙克考慮行呢一步嘅基礎，係源於前車路士中場狄亞拉，上年喺歐洲法庭同國際足協打官司勝訴，法庭喺呢單歷時9年嘅官司入面，指國際足協嘅轉會條例違反歐洲勞工自由流動原則，判決被視為第2單「波士文法案」，有機會顛覆足球轉會市場運作。當然，伊沙克要解除合約困難重重，所以佢哋視呢一步為「核彈級」最後方案，只為逼使紐卡素放人。

據報利物浦賣走路易斯迪亞斯後，準備再次提高開價，消息指利物浦願意先支付6,000萬鎊，明年再支付6,000萬鎊，分兩期畀合共1.2億鎊轉會費，另會再加2,000萬鎊獎金條款，成個收購總值1.4億鎊，貼近紐卡素1.5億鎊嘅叫價。