紐迷轟伊沙克背信棄義　「過來人」奧雲護航

瑞典前鋒阿歷山大伊沙克，為轉會利物浦同紐卡素徹底反面，大批「紐迷」表示憤怒，紐卡素訓練基地外更被掛上橫額，寫住「伊沙克完全係隻老鼠」，意思鬧佢係背信棄義嘅反骨仔。不過作為「過來人」嘅英格蘭前鋒奧雲，就為伊沙克行為辯護。

伊沙克近兩季英超都入超過20球，雖然佢同紐卡素仲有3年合約，但就出盡法寶要求轉投利物浦，紐卡素球迷群起炮轟呢位瑞典前鋒反骨。喺2004年由利物浦轉會皇家馬德里，之後踢過紐卡素同曼聯嘅奧雲，多年來一直受到利物浦球迷攻擊，佢對伊沙克遭遇就感同身受。

奧雲表示：「所有好球員，都會有大球會斟介，而且最終都會轉會。你希望足球賽事有競爭，站喺球員立場，佢哋都想喺短暫生涯贏取最多獎項，大部份球員都想去更好嘅球會踢波，而唔係為錢，呢個現象永遠都唔會改變。」