夏基美「強姦案」將移交刑事法庭　面臨15年監禁

歐聯冠軍巴黎聖日耳門(PSG)球星夏基美2年前捲入強姦案有新發展，根據法國《巴黎人報》報道，當局經過調查及聆訊後，檢察院已經搜集足夠證據，並向預審法院提出申請，將呢位26歲摩洛哥國腳移交刑事法庭審訊，如果罰成，佢將面臨最高15年監禁，令球員生涯毀於一旦。

案件發生於2023年2月，一名女子向警方報案，指被夏基美強姦，案情指兩人透過社交網Instagram認識，經過數個月交流後，夏基美趁老婆同兒子去杜拜旅行，邀請該名女子去佢嘅豪宅。受害人報稱抵達後，被夏基美強吻，並被佢強姦，其後該名女子踢開夏基美，逃走後再通知朋友接應。

法國警方接報後，即時對夏基美展開調查，已經喺預審法院進行聆訊，呢位右後衞一直否認指控，並聲稱因為自己屬於名人，遭到「有心人」勒索，要求金錢利益。經過兩年幾時間調查及聆訊，檢察院現時掌握足夠證據，申請展開刑事審訊，只要預審法院法官簽署批准，就可以成事，根據法國法例，一旦夏基美被判強姦罪成，最高刑罰係監禁15年。

夏基美4年前由國際米蘭加盟PSG，協助呢支法甲勁旅奪得4次聯賽冠軍等多項錦標，屬於球隊成為上季法甲、法足盃及歐聯「三冠王」功臣，亦有份出戰上月世冠盃決賽，但不敵車路士，屈居亞軍。