曼聯搵錢新招　奧脫福直播客戰每位25鎊

曼聯近年財政欠佳，新股東拉特克利夫除咗頻頻出手節省開支之外，亦要諗辦法增加收入，根據英國《每日郵報》報道，紅魔鬼將於新一季推出奧脫福「直播客戰套餐」，每位盛惠25鎊(約260港元)，有波睇之外，仲有飲品及食物提供。

曼聯作客賽事門票一向非常渴市，唔少紅魔球迷買唔到波飛，未能隨隊出征睇波，會方睇到商機，新一季推出「直播客戰套餐」，喺主場奧脫福球場嘅大型套房內，以大螢幕直播作客賽事，每人入場費25鎊，包含一杯免費飲品及食物，營造酒吧睇波氛圍。曼聯季票持有人士可以優先購買新一季英超頭3場作客賽事對富咸、曼城、賓福特嘅「直播客戰套餐」。

曼聯內部人士透露，希望今次計劃可以滿足球迷睇作客比賽嘅需求，並認為屬於一種超值美好體驗。