美斯將續約3年　同C朗齊睇踢到「40+」

國際邁亞密球王美斯將於年底約滿，早前傳出佢可能離隊，轉投意甲球隊科木，幫助老友法比加斯。不過，現時情況出現大逆轉，根據西班牙《馬卡報》爆料，呢位38歲阿根廷國腳準備續約3年，同宿敵C朗齊睇，踢到40歲以上。

據悉美斯嘅代表團隊同國際邁亞密會方談判續約一事，進行得非常順利，呢位射手想繼續留隊，國際邁亞密亦唔考慮年齡因素，願意向美斯開出最少3年合約，意味佢起碼會踢到41歲，甚至將來掛靴後會擔任國際邁亞密管理層。美斯至今總共為國際邁亞密上陣69場入58球及28次助攻，表現仍然有心有力。

事實上，美斯2年前由巴黎聖日耳門轉投國際邁亞密，獲得球會股份，為人為己，首選必定係繼續為國際邁亞密作出貢獻。