RB萊比錫勁大咬！紐卡素紀錄價買施斯高照被拒

曼聯同紐卡素嘅「施斯高爭奪戰」進入白熱化階段，據報紐卡素周六(2日)開出總值8,000萬歐元轉會費，但被RB萊比錫一口拒絕。曼聯方面仍未正式開價，佢哋正等待施斯高答覆想去邊度，若呢位斯洛文尼亞前鋒表態願意加盟，曼聯就會正式出手。

據《The Athletic》報道，紐卡素開出7,500萬歐元轉會費，外加500萬歐元獎金條款，不過RB萊比錫就獅子開大口，要求獎金條款大幅提高，另外仲要增加「二次轉會分成」，對於只得22歲嘅施斯高嚟講，下次轉會分成動軋都過千萬歐元，令轉會總值隨時過1億歐元。

轉會權威羅曼諾消息指，轉會關鍵係施斯高嘅意向，紐卡素同曼聯目前都未放棄，只要施斯高作出決定，被「選中」嘅球會就會向RB萊比錫再開價，羅曼諾更指出施斯高「短期內」就會做出終極選擇。