【官宣】韋斯咸簽哥林威爾遜　安東尼奧離隊

英超球會韋斯咸周日(3日)宣布，自由身前鋒哥林威爾遜同球會簽約1年，呢位33歲老將會取代「老友」米查利安東尼奧嘅位置。上年遇上嚴重車禍嘅安東尼奧，今夏雖然已經復出，但韋斯咸仍然決定唔會同佢續約，畀佢自由轉會。

曾效力般尼茅夫、紐卡素嘅哥林威爾遜，簽約韋斯咸後表示：「好興奮可以加盟韋斯咸，我哋有相近嘅足球熱誠──努力、決心、對成功嘅渴求，好慶幸成為球隊一份子。韋斯咸有好多好球員，領隊樸達加入後更加團結一致，我哋喺新球季會爭取最高嘅排名。」

哥林威爾遜嘅加盟，將取代「老友」安東尼奧嘅位置，兩人過去曾一齊主持網上足球節目，不過安東尼奧同韋斯咸嘅合約已經完結，韋斯咸一直未有明確表示會唔會續約，但樸達日前公開證實，35歲嘅安東尼奧已經唔喺佢計劃之內。