曼聯搵定般費接班人　目標直指巴塞猛將

曼聯今夏已豪花近1.28億鎊(約13.3億港元)收購2位前鋒馬菲奧斯根夏、麥比奧莫，但仍然未夠喉，根據西班牙媒體《每日體育報》爆料，紅魔鬼計劃以6,100萬鎊(約6.4億港元)買入巴塞隆拿中場費明盧比斯，作為般奴費南迪斯接班人。

「轉會權威」記者羅曼諾(Fabrizio Romano)日前引述曼聯內部消息，指球隊唔只買前鋒及門將，仲會考慮簽入中場。現時傳出紅魔鬼目標係費明盧比斯，呢位22歲西班牙國腳近2季屬於巴塞主力，合共上陣88場有19球進帳，並協助西班牙奪得上年奧運男足金牌及歐國盃冠軍，早已傳出有沙特阿拉伯豪門提出收購呢位猛將，曼聯現時亦想加入爭奪。

據悉曼聯之所以睇中費明盧比斯，除咗佢本身球技出色之外，亦由於隊長般奴費南迪斯再次受到艾納斯挖角，有可能離隊。盛傳呢支沙特勁旅出動C朗做說客，勸般費一齊合作打江山，艾納斯早前已簽入另1位葡萄牙國腳祖奧菲歷斯。

般費上年已經拒絕艾納斯1次，但隨住曼聯簽入馬菲奧斯根夏、麥比奧莫，令佢重要性下降，今次可能會改變主意接受艾納斯「肥約」，曼聯需要搵定接班人，希望收購費明盧比斯。不過，費明盧比斯身為巴塞主將，恐怕紅魔鬼要簽入佢，並非易事。