巴塞為幫福仔註冊　中場新星慘成犧牲品

西甲冠軍巴塞隆拿近年備受財困問題困擾，導致妨礙球員註冊，現時又要忙於整靚盤數，為拉舒福特等新兵註冊。最新消息指巴塞管理層計劃出售中場馬克卡沙度，希望獲得3,000萬歐元(約2.7億港元)轉會費收入，同時騰出薪酬空間畀「福仔」註冊。

西班牙《阿斯報》指拉舒福特加盟巴塞隆拿近2星期，但會方仍未能為呢位27歲英格蘭前鋒完成西甲球員身份註冊，現時最簡單直接方法就係賣走部分球員，馬克卡沙度將成為「犧牲品」。

呢位21歲西班牙國腳上季迅速冒起，上陣36場入1球及6次助攻，但3月受傷後，被法蘭基迪莊重奪正選，加上18歲新星馬克貝拿亦有出色表現，令馬克卡沙度重要性大減，巴塞方面準備出售馬克卡沙度，標價為3,000萬歐元，盛傅馬體會有意接貨。

同人唔同命，近日傳出另1位巴塞隆拿中場費明盧比斯可能離隊，包括曼聯想簽佢，但教練費歷克立即否認，話絕對唔會放走呢位22歲西班牙國腳。費明盧比斯上季46次披甲入8球及10次助攻，球隊爭標過程發揮重要作用。