艾美利有「說明書」　想簽尼高拉斯積遜

車路士今夏簽入多位進攻球員後，盛傳有意出售「敗家仔」前鋒尼高拉斯積遜，一度成為曼聯收購目標，現時有新買家加入爭奪，消息指阿士東維拉主帥艾美利希望簽入呢位昔日維拉利爾舊部屬。

根據英國《鏡報》爆料，艾美利仍然非常欣賞尼高拉斯積遜，甚至為咗收購呢位24歲塞內加爾國腳，願意出售隊內前鋒奧尼屈堅斯。艾美利2020至22年執教維拉利爾期間，一手從B隊提拔尼高拉斯積遜，令佢後來有機會上位，2年前被車路士收購，兩人亦師亦友。

車路士現時打算放走尼高拉斯積遜，艾美利希望同佢重聚，問題係車仔要求8,000萬鎊(約8.3億港元)轉會費，維拉難以負擔，若然真係要收購尼高拉斯積遜，難免需要先出售球員集資。

奧尼屈堅斯近期成為曼聯收購目標，艾美利可能會趁機賣走呢位29歲英格蘭國腳，增加本錢簽入尼高拉斯積遜。除咗積遜之外，艾美利亦睇中RB萊比錫鋒前鋒奧賓達，估計呢位25歲比利時國腳身價為4,000萬鎊。