曼聯2比2和愛華頓 新三叉戟亮相即捧盃！
正喺美國參加「英超夏季系列賽」嘅曼聯，周一(4日)朝早最後一戰同愛華頓踢成2比2平手，並以3戰2勝1和戰績勇奪冠軍，新球季開鑼戰先聲奪人。曼聯今場派出「新三叉戟」般奴費南迪斯、馬菲奧斯根夏同麥比奧莫合作攻堅，製造唔少流暢攻勢，令球迷期待。
由賓福特加盟嘅麥比奧莫今場首演，新三叉戟早段已有精彩合作，可惜根夏最後一腳射斜未能入波；19分鐘阿密特迪亞路博到12碼，隊長般奴費南迪斯操刀射入。不過，曼聯防線依然不穩，40分鐘曼紐爾烏加特後場甩波，伊利文尼戴耶接應傳中近門射入。
曼聯新三叉戟精彩反擊：https://x.com/i/status/1952115423643848957
般奴費南迪斯射入12碼：https://x.com/i/status/1952118281638215754
換邊後曼聯仍然佔優，69分鐘後備上陣嘅美臣蒙特，接應般奴費南迪斯妙傳射成2比1，但6分鐘後防線再次犯錯，阿密特迪亞路勉強解圍，竟然省中自己友艾登希雲反彈入網，最終2比2打和。曼聯早前2比1贏韋斯咸、4比1贏般尼茅夫，以3戰得7分成績，力壓6分嘅韋斯咸贏得冠軍。
今場1射1傳嘅般奴費南迪斯賽後表示：「曼聯嘅文化就係勝利，我哋要將佢帶返嚟，球隊正努力嘗試去改善，喺曼聯我哋唔可以行錯任何一步，因為全世界都喺度關注你。好明顯我哋仲需要引入更多競爭，簽更多高質素球員去激發球員，我相信球會正努力緊，希望可以再簽多1至2個球員。」