坦哈格成功挽留人物　舒希克續長約

德甲勁旅利華古遜正式宣布，同首席射手柏德列舒希克續約至2030年，總算及時「止血」，避免再有主力離隊，新教練坦哈格可以暫時鬆一口氣。

柏德列舒希克上季表現大勇，上陣45場入27球，創出職業生涯單季最多入球紀錄，呢位29歲捷克國腳原本只剩下2年合約，盛傳意甲勁旅AC米蘭有意收購佢，最終利華古遜成功說服舒希克續約。

柏德列舒希克話：「利華古遜一直致力成為頂級球隊，並相信可以成為德甲及歐洲賽一股重要力量。」利華古遜今夏出售科利安華迪斯、謝利美費林邦、莊拿芬泰希、格列沙加等多位主力，今次成功挽留柏德列舒希克，對於保持實力非常重要，坦哈格早前表示，需要再簽入4至5位球員，新一季先至有能力爭取打入前4位。