施斯高成「魔」好事近　莊家緊急封盤

曼聯今夏重金增兵行動一浪接一浪，英國各大傳媒及「轉會權威」記者羅曼諾(Fabrizio Romano)最新不約而同指紅魔鬼已正式提出報價，以總值7,400萬鎊(約7.7億港元)轉會費收購RB萊比錫前鋒班捷文施斯高，英國博彩公司Betfair隨即將呢位22歲斯洛文尼亞國腳嘅轉會投注項目封盤，睇來施斯高成「魔」好事近。

近期盛傳紐卡素同曼聯都有意簽入班捷文施斯高，據悉紐卡素日前開出總值7,800萬鎊轉會費搶購呢位「新夏蘭特」，曼聯現時亦正式出手，雖然報價比「喜鵲」低，但擁有一張人情牌，紅魔鬼嘅招聘總監韋維爾擔任薩爾斯堡管理層期間，曾經同當時效力呢支奧地利球隊嘅班捷文施斯高共事，兩人私交甚篤，韋維爾亦深知呢位射手實力，積極向紅魔鬼推薦簽入佢。

此外，消息人士指班捷文施斯高傾向加盟曼聯，過多轉投紐卡素，因為紅魔鬼歷史地位、全球知名度，以至商業價值都遠勝「喜鵲」，如果兩間球會開出相若條件，佢會選擇成「魔」，甚至唔介意曼聯新一季冇份踢歐洲賽。班捷文施斯高效力RB萊比錫兩季合共上陣87場入39球，包括上季有21球進帳，佢近日被安排獨立操練，似乎離隊已成定局。

曼聯一出手，英國博彩公司Betfair立即將班捷文施斯高轉會投注項目封盤，發言人話：「施斯高之前轉會賠率為1.53倍，現時已封盤，曼聯今夏已簽入馬菲奧斯根夏、麥比奧莫，唔可以忽視球會增兵決心。」至於曼聯前鋒海倫轉投RB萊比錫嘅賠率熱到1.3倍，令人聯想紅魔鬼可能用呢位丹麥國腳作為交易籌碼，近日就傳出會方願意減價，以3,000萬鎊出售海倫。

由於曼聯2位鋒線新兵馬菲奧斯根夏、麥比奧莫並非正宗射手，班捷文施斯高屬於球隊最需要嘅中鋒，紅魔鬼對於簽入佢志在必得。