遭紅魔鬼第3次截胡　紐卡素有「Plan B」

紐卡素今夏增兵計劃頻頻遭曼聯破壞，原本收購目標人物馬菲奧斯根夏、麥比奧莫已經被紅魔鬼截胡，現時「施斯高爭奪戰」，亦可能被對方捷足先登。根據《ESPN》報道，紐卡素有「Plan B」，一旦未能簽入班捷文施斯高，就會改為收購巴黎聖日耳門(PSG)前鋒干卡路拉莫斯。

首席射手阿歷山大伊沙克早前提出轉會，希望加盟利物浦，已被領隊艾迪侯域雪藏，會方正在物色前鋒取代佢，由於頭號目標班捷文施斯高傾向成「魔」，需要搵定新人選，包括干卡路拉莫斯。

呢位24歲葡萄牙國腳2年前由賓菲加轉投PSG，當時轉會費總值達8,000萬歐元，但佢入「門」後，不獲教練安歷基重用，多數擔任後備，至今為PSG上陣86場入33球，包括上季有19球進帳及6次助攻，協助PSG成為法甲、法足盃及歐聯「三冠王」。

由於干卡路拉莫斯並非PSG主力，紐卡素收購成功機會比較大，加上呢位射手希望獲得更多上陣時間，唔排除轉會，雙方有望一拍即合。根據《Transfermarkt》估值，干卡路拉莫斯現時身價為4,000萬歐元(約3.6億港元)，比施斯高平一半。