曼聯豪氣再搶「新卡些度」　球迷興奮：個仔改名英力士！

曼聯新球季雖然冇得踢歐洲賽，盛傳財政亦出現嚴重問題，不過佢哋夏天轉會市場就非常豪氣，RB萊比錫前鋒施斯高接近加盟後，據報「紅魔鬼」準備再出高價搶簽白禮頓中場卡路士巴利巴，有球迷興奮表示：如果搞得掂，我第1個仔會改名英力士！

曼聯夏天已斥重金簽入馬菲奧斯根夏同麥比奧莫，近日又成功爭贏紐卡素，準備以7,400萬鎊買入前鋒施斯高。執完鋒線後，曼聯下個目標係白禮頓中場卡路士巴利巴，轉會權威羅曼諾透露：「曼聯今個星期接觸巴利巴陣容，睇下轉會可能性。白禮頓唔想賣，叫價會好高，曼聯相信同巴利巴達成個人條件唔係問題，但同白禮頓斟介就會困難重重。」

巴利巴同白禮頓合約去到2028年，21歲嘅佢被譽為「新摩西斯卡些度」，預計白禮頓會為呢位喀麥隆中場叫價8,700萬鎊。對於曼聯新老闆拉特克利夫突然闊綽，唔少球迷都話完全改觀，有球迷更留言表示：「如果我哋簽到巴利巴，我會將第1個仔改名做INEOS(英力士)」！