湯馬士梅拿亮相溫哥華　3星登陸美職有睇頭

美職今個暑假有唔少轟動轉會，除南韓球星孫興民加盟FC洛杉磯，德國名將湯馬士梅拿周四(7日)亦正式簽約溫哥華白帽，連同阿根廷國腳迪保羅早前加盟國際邁亞密，3大球星來投令美職更有睇頭！

梅拿同拜仁慕尼黑合約完結後，告別17年拜仁生涯，周四同溫哥華白帽簽約至2025年球季結束，並有續約至2026年嘅選項。35歲嘅梅拿表示：「好期待嚟到溫哥華幫球隊爭冠軍，我聽到好多關於呢個城市嘅吸引之處，但最重要係爭取勝利，希望盡早落場同球迷見面。」

美職本來已有美斯、蘇亞雷斯、布斯基斯、馬高列奧斯、恩斯治尼等球星，過去1個月再加入孫興民、迪保羅同湯馬士梅拿，令美職更加星光熠熠。