【有片】格連活特「魔性澎湃」 粗野踢人引爆衝突
去片睇格連活特有幾凶狠
周日(10日)凌晨熱身賽，馬賽以3比1擊敗阿士東維拉，翼鋒格連活特集「天使與魔鬼」於一身，入波之外，亦粗野踢人，引爆雙方球員激烈衝突，呢位23歲英格蘭球星離開曼聯之後，仍然「魔性澎湃」。
開賽5分鐘，阿士東維拉中堅泰朗明斯犯錯，被格連活特截到波，再推過門將比蘇治，射入空門為馬賽打開紀錄，維拉好快由中場約翰麥甘尼單刀笠射入網扳平。
換邊之後，馬賽教練迪薩比換入早前回巢嘅老將奧巴美揚，呢位36歲前鋒立即展開功架，個人梅開二度，協助球隊領先3比1。
踢到86分鐘，格連活特作出冇必要嘅犯規，從後踢跌對手阿馬度奧拿拿，兩人立即發生爭吵，泰朗明斯亦加入戰團，並且反應非常激動，扯住格連活特衣領，幾乎想出手打人，兩人繼續互相拉扯，幸好雙方球員及時介入勸交同分開兩人，先至冇造成更大衝突。
賽後多數網民撐泰朗明斯，認為佢為隊友出頭有義氣，充滿男子氣慨，但亦有人指呢位英格蘭中堅犯錯，被格連活特入波，所以老羞成怒趁機搵對方「報仇」。