奇雲迪布尼1傳2射　拿玻里擊敗「曼城細佬」

周日(10日)凌晨熱身賽，拿玻里以3比2擊敗西甲奇兵基羅納，新加盟球星奇雲迪布尼大顯功架開齋，射入2球，證明自己寶刀未老，新一季令人期待。

奇雲迪布尼今夏約滿離開效力10年嘅曼城，以自由身加盟意甲冠軍拿玻里，呢位34歲比利時國腳近期熱身賽表現一般，今仗遇上與曼城屬同一集團嘅「姐妹球會」基羅納，演出特別醒神，一開波就有1次勁射斜出。轉個頭奇雲迪布尼開出角球，後衞迪羅倫素頂入打開紀錄，當時只係開賽4分鐘。

奇雲迪布尼貢獻助攻後，自己都入番1球，接應國家隊隊友盧卡古傳中，勁射入網，跟住佢把握門前混戰，射入成3比0，個人梅開二度。上半場後段，基羅納靠38歲前鋒史杜安尼入2球，追至2比3，但換邊後，雙方再冇波入，拿玻里維持贏3比2。

值得一提，曼城都去咗意大利踢熱身賽，以3比0大勝意乙球隊巴勒莫，射手艾寧夏蘭特入波打開紀錄，新加盟中場雷恩達斯更加梅開二度，證明自己有能力成為奇雲迪布尼接班人。