贏到開巷！華迪斯大熱膺德國足球先生

利物浦今夏用破英超轉會費紀錄收購嘅科利安華迪斯，周日(10日)以大熱姿態獲選德國足球先生，得票遠遠拋離第2位嘅米高奧利斯，更獲上季得主卻奧斯大讚，稱轉會利物浦係正確決定。

華迪斯上季為利華古遜貢獻16個入波同15次助攻，個人表現相當搶鏡，最終以191票高分當選德國足球先生，大幅拋離第2位嘅米高奧利斯(81票)同禾達美迪(71票)首度得獎。

德國足球先生由《踢球者》雜誌主辦，由記者投票選出上季表現最好嘅德國或德甲效力球員，對上2屆得主就係根度簡(2023年)同卻奧斯(2024年)。

卻奧斯接受《踢球者》訪問表示：「冇人比華迪斯更值得繼續我呢個獎項，佢喺各方面都非常特別，加盟利物浦亦係好正確嘅決定，證明佢有決定同雄心壯志。」