費倫巴治力斟辛真高　摩連奴改造新位置

土超勁旅費倫巴治喺摩連奴執教下，今個夏天大展拳腳，繼簽入尼爾遜施美度、史堅尼亞、祖漢杜蘭等球星後，近日再出價力斟阿仙奴嘅辛真高，而且摩連奴銳意將佢改造，計劃畀佢轉踢防守中場。

據土耳其傳媒報道，費倫巴治同辛真高經理人正進行接觸，將會正式提出收購，阿仙奴方面叫價為2,000萬歐元，但強調如果費倫巴治同球員傾掂數，佢哋會願意「減價」促成轉會。

辛真高同阿仙奴合約明年完結，由於左閘位置已被卡拉費奧利同利維斯史基利霸佔，辛真高已經唔喺領隊阿迪達計劃之內，據報英超球會富咸亦對佢好有興趣。

有趣嘅係，土耳其媒體指摩連奴計劃將辛真高改造成「6號」，呢位烏克蘭國腳喺國家隊踢進攻中場，喺球會就踢左閘，但摩連奴認為佢嘅傳控能力同視野，可以勝任組織型防中位置。