一種情況　基艾沙可留效利物浦

利物浦翼鋒費達歷高基艾沙冇份參加早前「亞洲之旅」熱身賽，外界原本預料呢位27歲意大利國腳將於今夏離隊，但現時情況有變，最新消息指，如果紅軍未能簽入阿歷山大伊沙克，基艾沙就會留隊。

費達歷高基艾沙上年夏天由祖雲達斯加盟利物浦後，由於傷患問題及狀態欠佳，上季僅上陣14場入2球及2次助攻，早已傳出領隊施洛計劃放走呢位「玻璃腳」，國際米蘭、阿特蘭大及拿玻里都有意簽佢。

不過，意大利傳媒最新指利物浦並未準備放走費達歷高基艾沙，除非簽到新前鋒，先至會批准佢離隊。據悉紅軍方面仍在爭取收購紐卡素射手阿歷山大伊沙克，等交易落實後，再賣走基艾沙，否則佢將會留隊。

阿歷山大伊沙克被紐卡素領隊艾迪侯域雪藏，只能獨自操練，預料無緣出戰周六(16日)晚首輪英超作客阿士東維拉。盛傳紐卡素願意以1.3億鎊出售伊沙克，但利物浦只肯支付1.1億鎊。