PSG絕地連轟2球　互射12碼贏熱刺首奪歐超盃

周四(14日)凌晨歐超盃，歐聯冠軍巴黎聖日耳門(PSG)上演絕地反擊，喺85分鐘仍落後0比2嘅絕境下，連補時喺最後9分鐘連轟2球逼和熱刺，之後更喺互射12碼射贏4比3，歷史性奪得歐超盃冠軍，亦係呢支法甲豪門1年內第5個冠軍，成績驕人。

PSG踢完世冠盃後，復操只有1個星期，狀態明顯唔及踢咗6場熱身賽嘅熱刺，即使有74%控球率，但攻擊線始終谷唔起；反而熱刺利用體力化同穩守突擊踢法，有唔少偷雞機會，並靠2次死球攻勢，由一對中堅雲迪雲、基斯甸羅美路入波領先2球。

PSG逆轉關鍵係南韓國腳李康仁，佢67分鐘後備上陣，85分鐘禁區頂割草式勁射轟入網仔；PSG末段狂攻，補時4分鐘再由另一後備干卡路拉莫斯追平2比2，令冠軍要由12碼決定。PSG第1射域天拿宴客，但熱刺就有雲迪雲同馬菲斯泰爾失手，PSG最終贏4比3捧盃。

由1月份拎法冠盃開始，PSG再連奪法甲、法足盃同歐聯冠軍，今次歐超盃係球隊今年第5個冠軍，教練安歷基賽後表示：「熱刺今場表現更好，睇得出佢哋係操練咗1個半月，而我哋只得6日。足球有時就係唔公平，我哋最後10分鐘入2球係幸運，但球員同球迷一樣，保持信念去到最後1刻。」