李康仁創造歷史　孫興民發文勉勵熱刺

巴黎聖日耳門(PSG)周四(14日)勇奪歐超盃冠軍，贏波功臣李康仁賽後成為焦點，盛傳即將離隊嘅佢，成為首個喺歐超盃入波兼捧盃嘅南韓球員。至於啱啱離開熱刺嘅孫興民，亦發文勉勵熱刺，相信球隊會有美好未來。

今場歐超盃原本係「南韓打吡」，但隨住孫興民轉會FC洛杉磯，創造南韓歷史嘅任務就落喺李康仁身上。呢位24歲中場上季淪為大後備，據報夏天將會離隊，拿玻里、AC米蘭、沙職同土超球隊都對佢有意，今次捧盃後可望提高叫價能力。

李康仁今場後備上陣轟入救命波，互射12碼第4輪負責操刀亦完成使命，捧盃功勞極大。李康仁成為史上首個喺歐超盃入波兼捧盃嘅南韓球員，2008年朴智星曾為曼聯出戰歐超盃，但輸畀辛尼特，當時辛尼特亦有金東進同李浩，但後者未入大軍名單，而金東進亦未有落場。

前熱刺隊長孫興民喺賽後，亦發文勉勵舊戰友：「我以你哋為榮！唔需要失望，美好未來就喺前面，樂觀去迎接新球季，我仍然想念熱刺呢個大家庭。」熱刺將會喺周六(16日)嘅英超開鑼戰，主場迎戰新升班球隊般尼。