頂替當拿隆馬即捧盃 捷華利亞一戰封神！
巴黎聖日耳門(PSG)上季贏歐聯冠軍，意大利鋼門基安盧基當拿隆馬功勞極大，不過PSG今季出乎意料棄用呢位「世一」龍門，高價簽入盧卡斯捷華利亞頂替。23歲嘅捷華利亞今場首演，即撲出關鍵12碼成為捧盃英雄，賽後獲安歷基大讚特讚。
捷華利亞係上季法甲最佳門將，PSG即以4,750萬鎊將佢由里爾收購，上周日(10日)先至歸隊，今場立即正選上陣，佢今場作出5次撲救，更喺互射12碼階段救出雲迪雲嘅射門。安歷基賽後大讚：「今場靠晒捷華利亞，佢歸隊冇耐，但呢場係佢表演時間，好開心佢成功咗！當拿隆馬嘅情況令捷華利亞有更大壓力，但佢係個頂級門將，呢個冠軍係用嚟歡迎佢加盟。」
安歷基喺歐超盃賽前承認，棄用當拿隆馬100%係佢個人決定，因為安歷基希望引入唔同功能嘅門將。作為頂尖嘅傳統門將，安歷基更希望用一個有腳法、可以控傳嘅新世代龍門，提升龍門嘅戰術功能，捷華利亞上季傳球、長傳嘅次數同準繩度都遠勝當拿隆馬，亦係安歷基取捨其最大考慮。