森林發圍！開咧前狂使1億鎊連掃3猛將

新一季英超今個周末開鑼，上季神奇球隊諾定咸森林喺開波前突然發圍，1日內狂燒接近1億鎊達成3宗交易，曼城中場占士麥艾迪、葉士域治翼鋒奧馬利赫捷臣同雷恩前鋒卡利穆恩度將會加盟，另外仲傾緊借用巴西中場杜格拉斯雷斯，雄心勃勃。

森林上季大部份時間殺入聯賽前4，雖然季尾滑落跌到第7位，但因水晶宮被罰降踢歐協聯，森林新季可以參加歐霸盃。周日(17日)開鑼戰對賓福特前，森林就瘋狂掃貨，3,000萬鎊收購曼城嘅英格蘭新星占士麥艾迪，再以3,750萬鎊買葉士域治翼鋒奧馬利赫捷臣，2,600萬鎊簽卡利穆恩度亦已被雷恩接納。

英國《每日郵報》報道，森林同時接近續約赫臣奧度爾，而且同祖雲達斯傾緊，借用巴西防守中場杜格拉斯雷斯，令軍容大大增強。森林今夏已簽入巴西前鋒伊戈捷西斯，但亦將安東尼艾蘭加賣去紐卡素，估唔到喺英超開咧前突然出招。