師徒對決！艾摩廉指約基利斯有重大缺陷

曼聯主帥魯賓艾摩廉嘅士砵亭嫡系射手約基利斯，今夏拒絕曼聯改為加盟阿仙奴，英超首輪曼聯對阿仙奴上演「師徒對決」，勢必成為焦點，艾摩廉曾指出，約基利斯踢法上，原來存在重大缺陷！

約基利斯未加盟士砵亭之前只係一名二流射手，但去到士砵亭同艾摩廉合作，就脫胎換骨成為頂級前鋒，兩季攻入97球，可以話係艾摩廉一手提拔佢，而約基利斯踢法上嘅強項弱點，艾摩廉亦一清二楚。

艾摩廉曾喺前季歐霸盃16強，士砵亭被阿特蘭大淘汰出局後指出，約基利斯踢有好大缺陷：「佢有好多地方需要改進，無論佢面對速度慢或速度快嘅中堅，踢法都冇變，佢對比賽嘅理解有待提高，亦缺乏防守反應。」

至於約基利斯效力白禮頓時期嘅舊隊友格連梅利都踩埋一份，佢話：「約基利斯根本唔值6,400萬鎊咁貴，佢只係算唔錯，是否適合阿仙奴踢法，我都唔太肯定。」