「黑貓」變身大炒韋斯咸　誓逃升降機宿命

英超競爭激烈，新升班球隊想立足難度唔細，上季3支升班球隊最終齊齊降班，不過今季似乎有轉機，靠升班附加賽重返英超嘅新特蘭，周六(16日)開咧戰上演「黑貓大變身」，喺7名新兵壓陣下成功新舊融合，主場3比0大勝韋斯咸，證明自己唔係魚腩。

新特蘭拎到升班資格後，夏天花費超過1.3億鎊買11名新球員，當中7個喺今場做正選，包括一加盟即被任命為隊長嘅格列沙加。上半場踢成0比0後，新特蘭下半場發力連入3球，3個入球都係由上季升班功臣(馬恩達、丹尼爾保拉特、威爾遜伊斯多)攻入，顯示新舊球員融入唔錯。

新特蘭領隊拿比斯賽後表示：「今場好重要，證明球隊有能力喺英超立足，我哋保留上季升班嘅個性同風格，繼續建立團結嘅力量，呢班球員今場就顯示出嚟。」