曼聯簽唔到巴利巴　關注禾頓

曼聯斟介白禮頓中場卡路士巴利巴遇到極大阻力，對方開出1億鎊天價，令曼聯卻步，據報紅魔立即轉移目標，關注水晶宮中場禾頓，估計身價只係4,500萬歐元(約4.1億港元)，在曼聯可承受範圍內。

英國傳媒報道，曼聯搵齊前鋒「三叉戟」後，下個增兵目標直指中場，原本睇中喀麥隆中場巴利巴，不過白禮頓獅子開大口，認為巴利巴未來價值超過摩西斯卡些度，將會打破英超紀錄，於是開價1億鎊。

曼聯唔想再做「水魚」，只能放棄斟介巴利巴，轉為關注禾頓。21歲嘅禾頓去年1月由布力般流流加盟水晶宮，轉會費2,200萬鎊，1季半共上陣44場，為水晶宮贏得英足盃同社區盾，國家隊方面佢亦有分入選英格蘭出席去年歐國盃，上陣1場。

水晶宮主力正受多隊挖角，伊比爾治伊斯及馬克古希相繼獲各豪門垂青，禾頓同水晶宮仲有4年合約，但已算係優質潛力股，預計曼聯要面對各大豪門競爭。