VAR打救！車路士執1分　馬利斯卡：明天會更好

喺暑假稱霸世冠盃嘅車路士，周日(17日)英超開咧戰主場只能悶和水晶宮0比0，而且如果唔係VAR打救，將伊比爾治伊斯罰球入波作廢，車路士隨時連1分都袋唔到。雖然出師失利，但領隊馬利斯卡就表示球隊表現出色，明天會更好。

車路士主場控制戰局，但13分鐘幾乎先輸，伊比爾治伊斯禁區頂罰球直轟入網，不過VAR認為做「反人牆」嘅馬克古希，未有離開車路士人牆1米，結果判入球無效。車路士空有控球率，但射中龍門次數仲少過打反擊嘅水晶宮，加上艾斯迪華奧尾段錯失黃金機會，兩隊最後悶和0比0。

因「反人牆」違規被吹罰嘅情況相當罕見，《天空體育》指對上一次出現呢個情況，就係今年1月車路士對般尼茅夫，列斯占士完場前罰球射入，當時古古列拿又係撞開對方人牆，但球證同VAR都冇表示，最終車路士入波有效。

水晶宮領隊格拉斯拿賽後表示：「我哋知道要離開人牆1米，今次壓逼係開始早咗，但英超如果要執行呢條例要好小心，因為英超每場比賽、每次死球都會有呢啲阻擋，以往都會吹得好小心，所以今次判詐胡令我驚訝。當然，條例係咁我哋只能接受。」

車路士領隊馬利斯卡就對球隊表現感滿意：「我哋一直努力爭勝，我認為車路士今場值得贏波，可惜最後做唔到。我哋復操之後只係踢咗2場賽事，所以球隊會慢慢咁進步，未來會變得更好。」