海倫被艾摩廉無情掃走　正式加入「炸彈兵團」

曼聯今夏重組鋒線，班捷文施斯高、馬菲奧斯根夏同麥比奧莫加盟，開咧戰對阿仙奴亦粉墨登場，不過丹麥前鋒海倫就正式「玩完」，今場意外被踢出大軍名單，魯賓艾摩廉賽後公開證實想將佢賣走，正式加入「炸彈兵團」。

曼聯呢個暑假將想賣走嘅冗員邊緣化，拉舒福特、阿歷真度加拿祖、查頓辛祖同安東尼馬菲奧斯都被禁止跟隊練波，熱身賽亦冇份參與，被英國傳媒稱為Bomb Squad(炸彈兵團)。目前只有拉舒福特成功離隊，估唔到一直堅稱要留隊爭位嘅海倫，亦難逃「入隊」命運。

同「炸彈兵團」幾位麻煩友唔同，海倫對曼聯忠心耿耿，季前熱身賽亦頻頻上陣，估唔到開咧即被踢走。艾摩廉賽後表示：「係位置競爭問題，即管睇下轉會市場有咩發展。我哋有唔同特性嘅球員，海倫同施斯高係相同特性，所以我哋要作出選擇。」