古天奴率華斯高派6蛋　尼馬輸到喊

周一(18日)朝早巴甲上演話題之戰，兩大天才球星尼馬同菲臘比古天奴，回流巴西後正面交鋒，結果古天奴個人梅開二度，率領華斯高作客6比0大炒尼馬領軍嘅山度士。慘歷生涯恥辱嘅尼馬更「輸到喊」，賽後表示覺得非常羞愧。

同樣33歲嘅古天奴同尼馬，都係少年得志後去歐洲闖蕩，同樣經歷高峰後迅速滑落，喺國家隊合作無間，感情非常之好。尼馬喺6月同山度士續約，古天奴亦回巢母會華斯高，今場兩人對碰備受注目，勢估唔到結果一面倒，古天奴攻入2球，帶領華斯高大勝6比0，贏出呢場「護級大戰」。

尼馬經歷球員生涯最慘痛敗仗，輸波後流下男兒淚，古天奴亦有上前安慰，尼馬賽後表示：「我覺得好羞愧，今場表現令人好失望，球迷有權用非暴力行動去抗議，就算侮辱或詛咒我哋，都係佢哋嘅權利。」