基奧柯勢離開阿仙奴　波圖同英超雙雄爭奪

阿仙奴喺開咧戰作客1比0險勝曼聯，不過波蘭中堅積及基奧柯意外落選大軍名單，似乎將被賣走。據波蘭傳媒報道，葡超勁旅波圖已經開價，而水晶宮同愛華頓亦準備出手搶人。

阿仙奴左中堅位置由加比爾馬加希斯霸佔，但積及基奧柯上季尾頂替受傷嘅馬加希斯表現出色，引嚟唔少買家垂青。波蘭著名記者禾達斯基報道，波圖日前開價2,300萬鎊收購，但被阿仙奴一口拒絕，雙方仍然進行商討，而水晶宮同愛華頓亦表示興趣，阿仙奴3,000萬鎊叫價有機會達成。

據報阿仙奴本來唔想放人，但25歲嘅積及基奧柯希望可以去一間可以穩定上陣嘅球會，暫時屬意離開英超，曾經打滾過嘅意甲亦有唔少球會對佢虎視眈眈。阿仙奴上月簽入西班牙年輕中堅基斯甸摩斯基拿，可以代替積及基奧柯位置。