列斯聯爭議12碼贏愛華頓　莫耶斯怒斥英超球證

周二(19日)凌晨英超獨腳戲，時隔2年再戰英超嘅列斯聯，憑比賽尾段一記爭議性12碼，主場1比0擊敗愛華頓。今季英超3支升班球隊，有2隊喺首輪賽事全取3分，係英超史上第3次出現。不過愛華頓領隊莫耶斯，賽後炮轟英超球證執法水平低落。

自22/23球季後再戰英超，列斯聯今場表現出色，不斷壓逼令愛華頓飽受壓力，可惜埋門把握力不足，全場20次射門只得3次命中目標。唯一入球出現喺84分鐘，安東史達治遠射省中人後，省中瞓身擋波嘅達高斯基手臂，球證直指12碼，盧卡斯尼美查操刀射入，助列斯聯全取3分。

英超過去2季，3支新升班球隊全部做晒「升降機」，第2季即齊齊降班，不過今季情況似乎有所轉變，連同新特蘭3比0大勝韋斯咸，今季有2隊新升班球隊喺首輪贏波，係英超史上第3次出現，對上一次已經係2021年，而過去從未試過3支升班球隊首輪全勝。

今場12碼充滿爭議，愛華頓領隊莫耶斯賽後怒轟英超球證「唔掂」：「我肯定反對呢個12碼，亦深信唔應該係12碼，規例講明防守球員隻手垂低兼擺身後係冇問題，而且個波仲係省中人改變方向。我覺得英超球證首輪表現好差，我睇到好多差勁判決，呢球就係其中之一。」