【官宣】利物浦又神Deal　賣賓杜亞克去般茅賺到笑

利物浦喺夏天轉會市場風頭出盡，唔單止巨資買入域斯、艾基迪基等猛將，賣人同樣賺到盤滿鉢滿。周二(19日)宣布將19歲前鋒賓杜亞克賣去般尼茅夫，佢3年前以60萬鎊轉會費加盟，雖然只為利物浦踢過3場英超，但依家就以2,500萬鎊過檔般茅，堪稱「神Deal」。

般茅同賓杜亞克簽約5年，呢位蘇格蘭國腳將着11號波衫，佢簽約後表示：「好興奮嚟到般茅，呢個係轉會合適時間，我會爭取喺最高水平賽事立足，般茅踢波悅目、速度高，好適合我嘅踢法，所以我好難拒絕佢哋嘅邀請。」

利物浦喺2022年，用60萬鎊由些路迪買入賓杜亞克，上季外借英冠米杜士堡，上陣24場入3球，依家以超過40倍價錢賣走，獲得巨額利潤。利物浦上月亦以3,000萬鎊賣查洛爾昆沙去利華古遜，轉會操作絕對係「教科書」級別。