盧卡古長抖3個月　拿玻里急借海倫救亡

意甲前鑼前夕，上季冠軍拿玻里傳出噩耗，首席射手盧卡古早前踢熱身賽受傷，經過詳細檢查後，證實呢位32歲比利時國腳最少缺陣3個月，盛傳拿玻里計劃向曼聯借用前鋒海倫，以解燃眉之急。

拿玻里上周五(15日)凌晨踢最後1場熱身賽，以2比1擊敗奧林比亞高斯，盧卡古踢到33分鐘，左腳大腿受傷退下火線。檢查結果顯示呢位「魔獸」肌肉撕裂，傷勢嚴重，最少抖3個月，最壞情況係一旦要做手術，甚至可能養傷8個月。盧卡古上季聯賽上陣36場入14球及10次助攻，屬於捧盃功臣，佢長抖之下，勢必削弱球隊攻力。

拿玻里將於周日(24日)凌晨新一季意甲首仗作客薩斯索羅，預料會由新加盟前鋒羅倫素盧卡擔任正選，除咗呢24歲意大利國腳之外，已冇其他中鋒人選，所以會方考慮向曼聯借用海倫。呢位丹麥國腳已被領隊魯賓艾摩廉打入冷宮，紅魔鬼願意放人，但另1支意甲球隊AC米蘭早已提出簽入海倫，拿玻里能否成功截胡，仍然存在變數。