韋沙「刪除」賓福特逼轉會　紐卡素球迷唔Buy

紐卡素前鋒阿歷山大伊沙克為轉會利物浦，不惜同球會反面，甚至連屋都搬埋，誓言唔會再幫紐卡素上陣，估唔到紐卡素想買嘅前鋒尤尼韋沙都有樣學樣，近日將社交網上所有賓福特資訊刪除，正式同球會割席，威脅賓福特將佢賣去紐卡素。

28歲嘅韋沙上季喺英超入19球，成功獲紐卡素垂青，被視為頂替「叛徒」伊沙克嘅人選，不過紐卡素開價3,000萬鎊被拒絕，賓福特要求至少5,000萬鎊轉會費，令韋沙非常不滿，季前集訓已提前離隊，首輪英超亦未進入大軍名單。

韋沙日前再出招，將社交網上所有關於賓福特嘅相片同資訊刪除，表明唔會再為賓福特上陣。不過，韋沙嘅做法亦引嚟紐卡素球迷不滿，認為佢嘅行動「同伊沙克一樣嘔心」，呼籲紐卡素放棄收購。