沙拿破紀錄第3度當選球員先生　個人獎「帽子戲法」

英格蘭職業足球運動員協會(PFA)周二(19日)晚舉行頒獎禮，公布上季各大獎項，利物浦翼鋒穆罕默德沙拿當選代表最佳男子球員嘅英格蘭球員先生，呢位33歲埃及國腳成為史上首位3次獲此殊榮嘅球員，加上佢之前已經奪得上季英格蘭足球先生及英超最佳球員，完成個人獎項「帽子戲法」。

穆罕默德沙拿曾於2018及22年獲得英格蘭球員先生獎，佢對於第3次當選感到難以置信：「到咗33歲仲可以拎到呢個獎，覺得不可思議，多謝各位投票支持我嘅人士，仲記得10年前首次來到英超，效力車路士一無所獲，我一直自我反省，身為1位埃及人可以創造歷史，感到好自豪。」沙拿上季英超射入29球及18次助攻，兩項數據都排第1位，獲得同業投票成為英格蘭球員先生絕對實至名歸。

利物浦亦成為頒獎禮大贏家，有5位球員入選最佳11人陣容，包括穆罕默德沙拿、華基爾雲迪積克、賴恩格雲貝治、阿歷斯麥亞里士打，以及由般尼茅夫來投嘅左閘米路斯卻基斯。其餘6人分別為諾定咸森林門將素斯、前鋒基斯活特、阿仙奴中堅威廉沙列巴、加比爾馬加希斯、中場迪格蘭賴斯、紐卡素前鋒阿歷山大伊沙克。

另外，阿士東維拉中場摩根羅渣士獲得最佳年輕球員，呢位23歲英格蘭國腳上季英超上陣37場入8球及11次助攻，阿仙奴女足前鋒奧莉華史密絲當選最佳女子球員。