辛祖拒投羅馬真相曝光　原來係經理人玩嘢

曼聯翼鋒查頓辛祖原本已經接近轉投羅馬，但臨尾又失敗，根據意大利傳媒爆料，呢位25歲英格蘭球星嘅經理人獅子開大口，要求紅魔鬼支付1,100萬歐元(約1億港元)佣金，佔轉會費近一半，紅魔鬼立即拒絕，導致交易未能成事。

據悉曼聯本來已接受羅馬報價，以2,300萬歐元(約2.1億港元)轉會費將查頓辛祖出售畀呢支意甲球隊，辛祖亦接受500萬歐元年薪加獎金嘅個人待遇條款。不過，經理人「胃口」極大，索取1,100萬歐元佣用，變相要瓜分曼聯近一半轉會費收入，會方自然唔肯，要求辛祖同經理人盡快尋找新方案。

由於查頓辛祖只剩下1年合約，經理人知道曼聯方面擔心佢明夏自由身離隊，令球會人財兩失，急於出售呢位「水貨」，所以苛索巨額佣金，想趁機大賺一筆，如果雙方都唔讓步，查頓辛祖今季可能冇得參加比賽。