車路士清貨進度緩慢　鬆手急放10球星

車路士今個夏天繼續大手買人，不過「清貨」進度就相當緩慢，距離轉會市場關閉只剩1個多星期，仍然有10位冗員「滯留」。據報車路士正加緊兜售，甚至願意用外借方式放人，尼干古、尼高拉斯積遜、史達寧等都等待接收。

英國《太陽報》報道，車路士仍然為9個球員搵緊買家，除兩大前鋒尼干古同尼高拉斯積遜外，史達寧、阿素迪沙斯、連拿度維加、卡尼卓克禾美卡、芝維爾、安斯文素同大衞科芬拿都被掛牌出售，至於新星泰列基佐治，就希望被外借磨練。

率先賣走嘅會係連拿度維加，轉會權威羅曼諾證實，維拉利爾出價2,950萬歐元收購呢位葡萄牙國腳，已獲車路士接納。尼高拉斯積遜目前獲AC米蘭、紐卡素等斟介，尼干古就獲拜仁慕尼黑、RB萊比錫垂青，不過通通都未達車路士要求價格，令轉會一直拖延。報道指車路士本來希望賣人套現，但依家時間緊逼，會考慮以外借附加買斷條款方式「促銷」，有望加速大掃除進行。