曼聯睇中士砵亭中場 因一個紋身被球迷反對
曼聯今夏執靚條鋒線後,依家集中火力買中場同龍門,據報「紅魔鬼」頭號目標係卡路士巴利巴,但白禮頓拒絕放人,逼使曼聯轉用Plan B,收購士砵亭隊長摩頓胡文特,不過呢位丹麥球星亦被曼聯球迷反對,事關佢有一個尷尬紋身!
白禮頓為巴利巴叫價1.2億鎊,等如話畀人知佢係「非賣品」,葡萄牙《記錄報》報道,曼聯領隊魯賓艾摩廉決定轉斟胡文特,佢同呢位丹麥中場喺士砵亭合作過,說服佢加盟問題唔大,但原因胡文特係阿仙奴球迷,左手手臂更有一大個阿仙奴標誌紋,嚟到曼聯都幾尷尬,所以唔少曼聯球迷都提出反對。
胡文特上年受訪透露:「我爸爸係阿仙奴球迷,所以細細個我就同爸爸一齊睇阿仙奴,韋拉就係我嘅模範球員。」報道指胡文特合約內本來有6,800萬鎊買斷條走款,但已經過咗期限,曼聯要簽人就需要同士砵亭重新斟介。