泰希入拜仁「領袖小組」　金玟哉或去沙特

德國國腳莊拿芬泰希今夏加盟拜仁慕尼黑後，立即受到教練高柏尼重用，雖然加盟唔夠3個月，但已被選入球隊「領袖小組」，代表球員發聲。泰希嘅上位亦令金玟哉失寵，盛傳呢位南韓中堅可能會離隊轉戰沙特。

據《天空體育》報道，湯馬士梅拿離隊後，拜仁嘅4人「領袖小組」出現空缺，29歲嘅泰希就授命加入，同哈利卡尼、甘美治、紐亞合作，負責代表球員同球會溝通，亦會一齊處理隊中大小問題。泰希喺球場上經常指揮隊友同作出溝通，充滿領導才能。

泰希同烏柏美卡奴將成為拜仁中堅拍檔，意味南韓國腳金玟哉會淪為後備，據德國媒體《Sport1》報道，拜仁雖然唔想賣金玟哉，但艾納斯等沙特豪門已表示有興趣收購，如果金玟哉真係離隊，拜仁將會返轉會市場物色替補人選。