「新尼馬」刷新車仔紀錄　巴西未來救星

車路士進攻主將高爾彭馬喺周六(23日)凌晨英超作客韋斯咸，開賽前熱身感到不適，未能上陣，新加盟森巴小將艾斯迪華奧臨危受命擔任正選，佢不負所托，表現非常出色，以18歲零180日成為車仔史上最年輕喺英超貢獻助攻嘅球員，並當選今場最佳球員，前途無可限量，被睇可以成為巴西國家隊未來救星。

車路士上年6月以3,400萬歐元(約3.1億港元)向彭美拉斯收購艾斯迪華奧，由於佢當時未滿18歲，等到今季先至正式上「車」。呢位天才翼鋒早前世冠盃為彭美拉斯上陣鬥車仔，已有精彩演出，獲得一眾新隊友熱烈歡迎。

艾斯迪華奧首輪英超對水晶宮後備上陣，今仗因為高爾彭馬臨時缺陣，獲得擔正機會，踢咗77分鐘，表現非常搶鏡，包括個人突破，殺入禁區右路近底線，傳畀安素費南迪斯射入空門，另外亦創造多次具威脅攻勢。

今場入1球及2次助攻嘅祖奧柏度都對呢位巴西同胞讚不絕口：「唔只領隊睇到艾斯迪華奧嘅天賦，車路士所有球員都會盡力幫助佢，睇見佢今場表現，我真係好開心，希望佢有光明未來。」

車仔簽到呢位新星固然可喜可賀，巴西主帥安察洛堤亦應該好開心，「森巴兵團」近年國際賽成績欠佳，自從尼馬沉淪後，更加缺乏1位可孭飛球星，艾斯迪華奧被指係自尼馬之後，最天才橫溢巴西球員，屬於未來10號主人，加上祖奧柏度冒起，「車仔鋒線」成為巴西爭奪明年世界盃冠軍最大本錢。