魯賓戴亞斯續約　艾達臣或月底走人

曼城2位防線主力命運大不同，會方宣布中堅魯賓戴亞斯續約至於2029年6月，相反門將艾達臣摩拉斯可能喺8月31日英超作客白禮頓之後離隊，轉投土耳其勁旅加拉塔沙雷。

魯賓戴亞斯原本仲有2年合約，「藍月亮」已經急不及待同呢位28歲葡萄牙國腳續約至2029年，魯賓戴亞斯話：「可以效力曼城，我覺得非常自豪，我哋踢緊最高水準足球，我真係好愛曼徹斯特。」魯賓戴亞斯5年前由賓菲加轉投曼城，上陣223場並有4球進帳，留住呢位主力有助穩定軍心。

另外，近期盛傳艾達臣摩拉斯將轉投加拉塔沙雷，曼城領隊哥迪奧拿話：「再睇下點先，踢完對白禮頓之後，轉會市場就會好快關閉，到時或者可以話一切已搞掂，至於現時仲未知會發生咩事。」艾達臣摩拉斯因為腸胃病，缺陣上場英超對狼隊，至於周六(23日)晚會否上陣對熱刺，仍然存在疑問。