皇馬禁止波衫印新星名字　真相竟然係咁？

皇馬今夏簽入馬斯坦奧奴(Franco Mastantuono)，但球迷透過官網購買球衣，卻被禁止印上呢位18歲阿根廷新星名字Franco，據悉係因為同西班牙已故獨裁者佛朗哥(Francisco Franco)撞名有關，會方唔想同呢位政治人物扯上關係。

根據西班牙傳媒報道，當球迷透過官網購買波衫，嘗試要求印上Franco，網頁立即彈出提示，話唔允許使用呢個名稱，引起爭議，認為球會審查制度太僵化，因為Franco一名非常普遍，唔一代表佛朗哥。

皇馬官方球衣印名「審查機制」，亦會過濾對手球員姓名，例如禁止印巴塞隆拿射手羅拔利雲度夫斯基、馬體會前鋒基沙文等人姓名，但有人試過印到拉芬夏比洛尼(Raphael)，可能呢個名比較普遍。

馬斯坦奧奴上場西甲開鑼戰對奧沙辛拿，後備上陣踢咗30分鐘，表現搶鏡，佢件波衫印姓氏Mastantuono，但球迷頻頻大叫Franco、Franco，睇怕皇馬應該無法「禁聲」。