曼城門將派膠　熱刺輕鬆贏兩粒

英超周六(23日)早場，曼城主場0比2不敵「剋星」熱刺。「藍月亮」今場表現未如理想，特別後防不穩，上半場被兩度攻破大門，熱刺反擊同前場逼搶均大派用場，作客「破城」全取3分，近4次對曼城贏3場。

曼城一如以往主場圍攻對手，熱刺打防守反擊，形成攻防戰，35分鐘，上場省兩球靚波嘅李察利臣成功破越位，右路落底線傳中，班倫莊臣門前輕鬆射入，雖然旁證一度舉旗示意越位，但經VAR判決入球有效，熱刺領先1比0。

完半場前曼城門將占士查科特嚴重犯錯，門前傳送時被李察利臣衝前截下，雖然占士查科特極力補救撲走李察利臣腳下球，但仍有祖奧包連夏從旁「執死雞」勁射破網，其後曼城射手艾寧夏蘭特頭槌頂高，熱刺半場領先2比0。

下半場曼城全軍出擊，先後換入貝拿度施華及養傷多時嘅洛迪卡斯簡迪，加強進攻力度，但未能攻破熱刺防線，最終熱刺贏2比0完場，開季2連勝。