紐卡素搵到伊沙克替身　睇中佐真拿臣

阿歷山大伊沙克為達轉會目的，現時罷操罷賽，據報紐卡素正尋找新援取代其位置，睇中賓福特嘅尤尼韋沙同狼隊前鋒佐真拿臣，其中同佐真拿臣傾妥個人條件，但轉會費可能高達6,000萬鎊(約6.34億港元)。

利物浦正斟介阿歷山大伊沙克，轉會費將接近1.5億鎊(約15.85億港元)，紐卡素希望先搵到新前鋒先放人，但已做好失去伊沙克嘅心理準備。

英國傳媒報道，紐卡素兩位新目標係尢尼韋沙同佐真拿臣，25歲嘅挪威前鋒佐真拿臣同紐卡素就個人條款達成協議，只差兩間球會接觸。

佐真拿臣上季為狼隊攻入14球4助攻，數據唔錯，但佢上季係由切爾達外借到狼隊，到今夏先至正式買斷加盟，轉會費據報為3,000萬歐元(約2.75億港元)。

目前情況，佐真拿臣唔會主動離開狼隊，而狼隊自己都唔夠人，因此亦唔打算出售，紐卡素亦未同狼隊直接談判，分析指紐卡素要簽入佐真拿臣，出價至少要6,000萬鎊先有得傾。